श्री शारदा माता चालीसा

मूर्ति स्वयंभू शारदा, मैहर आन विराज।माला, पुस्तक, धारिणी, वीणा कर में साज ॥

जय जय जय शारदा महारानी।आदि शक्ति तुम जग कल्याणी ॥

रूप चतुर्भुज तुम्हरो माता।तीन लोक महं तुम विख्याता ॥

दो सहस्र बर्षहि अनुमाना।प्रगट भई शारद जग जाना ॥

मैहर नगर विश्व विख्याता।जहाँ बैठी शारद जग माता ॥

त्रिकूट पर्वत शारदा वासा।मैहर नगरी परम प्रकाशा ॥

शरद इन्दु सम बदन तुम्हारो।रूप चतुर्भुज अतिशय प्यारो ॥

कोटि सूर्य सम तन द्युति पावन।राज हंस तुम्हारो शचि वाहन ॥

कानन कुण्डल लोल सुहावहि।उरमणि भाल अनूप दिखावहिं ॥

वीणा पुस्तक अभय धारिणी।जगत्मातु तुम जग विहारिणी ॥

ब्रह्म सुता अखंड अनूपा।शारद गुण गावत सुरभूपा ॥

हरिहर करहिं शारदा बन्दन।बरुण कुबेर करहिं अभिनन्दन ॥

शारद रूप चण्डी अवतारा।चण्ड-मुण्ड असुरन संहारा ॥

महिषा सुर वध कीन्हि भवानी।दुर्गा बन शारद कल्याणी ॥

धरा रूप शारद भई चण्डी।रक्त बीज काटा रण मुण्डी ॥

तुलसी सूर्य आदि विद्वाना।शारद सुयश सदैव बखाना ॥

कालिदास भए अति विख्याता।तुम्हारी दया शारदा माता ॥

वाल्मीक नारद मुनि देवा।पुनि-पुनि करहिं शारदा सेवा ॥

चरण-शरण देवहु जग माया।सब जग व्यापहिं शारद माया ॥

अणु-परमाणु शारदा वासा।परम शक्तिमय परम प्रकाशा ॥

हे शारद तुम ब्रह्म स्वरूपा।शिव विरंचि पूजहिं नर भूपा ॥

ब्रह्म शक्ति नहि एकउ भेदा।शारद के गुण गावहिं वेदा ॥

जय जग बन्दनि विश्व स्वरुपा।निर्गुण-सगुण शारदहिं रुपा ॥

सुमिरहु शारद नाम अखंडा।व्यापइ नहिं कलिकाल प्रचण्डा ॥

सूर्य चन्द्र नभ मण्डल तारे।शारद कृपा चमकते सारे ॥

उद्भव स्थिति प्रलय कारिणी।बन्दउ शारद जगत तारिणी ॥

दुःख दरिद्र सब जाहिं नसाई।तुम्हारी कृपा शारदा माई ॥

परम पुनीति जगत अधारा।मातु शारदा ज्ञान तुम्हारा ॥

विद्या बुद्धि मिलहिं सुखदानी।जय जय जय शारदा भवानी ॥

शारदे पूजन जो जन करहीं।निश्चय ते भव सागर तरहीं ॥

शारद कृपा मिलहिं शुचि ज्ञाना।होई सकल विधि अति कल्याणा ॥

जग के विषय महा दुःख दाई।भजहुँ शारदा अति सुख पाई ॥

परम प्रकाश शारदा तोरा।दिव्य किरण देवहुँ मम ओरा ॥

परमानन्द मगन मन होई।मातु शारदा सुमिरई जोई ॥

चित्त शान्त होवहिं जप ध्याना।भजहुँ शारदा होवहिं ज्ञाना ॥

रचना रचित शारदा केरी।पाठ करहिं भव छटई फेरी ॥

सत्-सत् नमन पढ़ीहे धरिध्याना।शारद मातु करहिं कल्याणा ॥

शारद महिमा को जग जाना।नेति-नेति कह वेद बखाना ॥

सत्-सत् नमन शारदा तोरा।कृपा दृष्टि कीजै मम ओरा ॥

जो जन सेवा करहिं तुम्हारी।तिन कहँ कतहुँ नाहि दुःखभारी ॥

जो यह पाठ करै चालीसा।मातु शारदा देहुँ आशीषा ॥

बन्दउँ शारद चरण रज, भक्ति ज्ञान मोहि देहुँ।सकल अविद्या दूर कर, सदा बसहु उरगेहुँ ॥

जय-जय माई शारदा, मैहर तेरौ धाम।शरण मातु मोहिं लीजिए, तोहि भजहुँ निष्काम ॥