Aarti Sai Baba

आरती साईबाबा।सौख्यदातार जीवा।चरणरजातळीं ध्यावा दासां विसावा, भक्तां विसावा॥धृ ॥

जाळुनियां अनंग।स्वस्वरूपी राहे दंग।मुमुक्षुजनां दावी निज डोळां श्रीरंग ॥१॥

जया मनी जैसा भाव।तया तैसा अनुभव।दाविसी दयाघना ऐसी तुझी ही माव ॥२॥

तुमचे नाम ध्याता।हरे संसृति व्यथा।अगाध तव करणी मार्ग दाविसी अनाथा ॥३॥

कलियुगीं अवतार।सगुणब्रह्म साचार।अवतीर्ण झालासे स्वामी दत्त दिगंबर ॥४॥

आठां दिवसां गुरुवारी।भक्त करिती वारी।प्रभुपद पहावया भवभय निवारी ॥५॥

माझा निजद्रव्य ठेवा।तव चरणरजसेवा।मागणे हेचि आता तुम्हां देवाधिदेवा ॥६॥

इच्छित दीन चातक।निर्मळ तोय निजसुख।पाजावें माधवा या सांभाळ आपुली भाक ॥७॥